II. 6. Cescon habitas. lxxxv

Κέσκον οἰκεῖς, id est Cescum habitas. In stupidum et bardum dicebatur. Cescos Pamphyliae civitas, cujus cives ob vecordiam stultitiamque vulgo male audiebant. Juxta Cescum urbem fluvius erat, cui nomen Ἄνους, id est Amens. Quanquam Suidas, qui et ipse proverbii meminit, Cescum ponit in Cilicia, non in Pamphylia. Unde et vulgari sermone jactatum est : Πόλις Κέσκος νοῦν οὐκ ἔχουσα, id est Cescus civitas mentis inops. Quadrabit et in coetum aut conciliabulum hominum stultorum. Convenit cum eo quod alias ostendimus : Boeotica sus. Adagium recenset Zenodotus. Illud obiter admonendum, locum hunc in Suida depravatum haberi in dictione Κέσκος et pro Κέσκον οὐκ ἔχειν legendum esse Κέσκον οἰκεῖν.

Index Adagiorum