II. 6. Buthus obambulat. lxxii

Βοῦθος περιφοιτᾷ, id est Buthus oberrat. De levibus ac stolidis dicebatur, a moribus Buthi cujusdam athletae, qui vicerat in Pythiis ludis. Hujus meminit Cratinus ἐν Χείροσι, teste Zenodoto. Meminit et Hesychius, indicans et Aristotelem alicubi de hujus victoria meminisse. Fieri potest ut huic id nominis inditum fuerit ab edacitate, quod solidos boves vorare soleat. Nam cognominatus est et Hercules βουθοίνας, quod aliquando esuriens quendam e bubus Theodamantis, quibus ille terram proscindebat, abductum occidit ac voravit. Unde videtur dici posse in edaces, hoc est βουφάγους.

Index Adagiorum