Ἐξ ἄμμου σχοινίον πλέκεις, id est Ex harena funem nectis. In stulte frustraque conantem quippiam dicebatur aut ubi quis ea connectere laboret, quae nequaquam cohaereant. Apposite dicetur in orationem aut syllogismum male cohaerentem, ut affine sit illis : Harena sine calce et Dissolutae scopae. In hanc fere sententiam usurpavit Irenaeus libro primo. Veluti faciunt qui colligunt Homerocentones. In summa quadrabit in quidvis ἀδύνατον καὶ ἄτοπον, ut pertineat et ad illam formam : Laterem lavas et Aethiopem dealbas.