Ἀγρὸς ἡ πόλις, id est Rus civitas. Ubi quis in urbe neglectis legibus vi proque sua libidine rem gerit. In civitatibus enim legibus ex aequo vivitur, in agris licentius agitur. Epicharmus apud Diogenianum : Ἀγρὸν τὴν πόλιν ποιεῖς, id est E civitate rus facis. Quadrabit etiam in civitatem, in qua legum non magnus habetur respectus. Huc allusit Seneca in ludicro libello, quem lusit in Claudium imperatorem : Vos mera mapalia fecistis, volo servetis disciplinam curiae.