Adagiorum Chiliades

II. 6Apage hospitem in tempestate.xxxi

Ἄπαγε ξένον ἐν χειμῶνι, id est Apage hospitem in tempestate. Dici solitum ubi quis importunius adveniret. Nam molestiam adferunt hospites, si quando in rebus adversis et afflictis superveniunt, quando familiares magis adesse convenit aegrimoniae lenitores. Si peregrini superveniant, ad calamitatis molestiam accedit pudor, interdum maxima malorum pars. Recte accommodabitur, si quando petitur quippiam a principe negotiis parum laetis occupato. Admonet idem adagium ne quis externus domesticis aliorum malis admisceat sese. Simile quiddam dixit Euripides in Alcestide :

Ἆρα τὸν ξένον

Στυγῶ δικαίως ἐν κακοῖς ἀφιγμένον;

[Alc.] id est

An non mihi jure optimo

Invisus hospes, qui in malis advenerit ?

Verba servi ad Herculem advenientem domo Admeti jam occupata luctu. Rursus in eadem fabula :

Λυπουμένοις ὀχληρός, εἰ μόλοι ξένος,

[Alc.] id est

Molestus hospes, tristibus si advenerit.