Bithus et Bacchius nobile par gladiatorum fuit, quorum mentionem Suetonius quoque fecit, pares arte, pares audacia. Proinde quoties duo aequaliter improbi contendunt inter sese, ita ut neuter alteri velit concedere, non intempestiviter dicemus, Bacchium cum Bitho commissum. Horatius in Sermonibus : Uti non / Compositus melius cum Bitho Bacchius, Rupili Persiique parem inter ipsos improbitatem et maledicentiam significans. Quicquid insigniter improbum est et ad omnem contentionem paratum, gladiatorium appellamus : gladiatoria corporis firmitas, gladiatoria audacia, gladiatoriis animis ad me affectant viam. Marcus Tullius in Philippicis Antonii fratrem aliquoties mirmillonem appellat, ut in Philippica sexta : Etiam ne ab hoc mirmillone Asiatico senatus mandata, legatorum verba audientur ?