II. 5. Contra retiarium ferula. lxxx

Martialis in epistolari quadam praefatione : Denique videas, an te delectet contra retiarium ferula, id est An id faciendum tibi putes, quod nemo non damnet atque exsibilet. Domitius Calderinus interpres admonet subesse proverbium dici solitum in eos, qui infirmo praesidio contra maxime instructum pugnarent. Quanquam idem paulo post alio dilabitur, nempe huc : gladiatores olim, si minus placuissent, ferula caesos ejici solere. Huic finitimum est illud Gellianum libro Noctium primo, capite II : An non contra istum baculum moveas ? Heus homo, quid mecum tibi ? Itaque ferulam aut baculum movere contra quempiam est refragari et insolentius repellere sententiam. Est autem ferula ligni genus, quo quondam pueri caedebantur atque item milites, si quid contra disciplinam facere viderentur. Opinor idem factitare solere in ludis gladiatoriis hujusmodi certaminibus praefectos.

Index Adagiorum