II. 5. Agamemnonis hostia. lxiii

Ἀγαμέμνονις θυσία, id est Agamemnonis victima, quondam in duros et persuasu difficiles dicebatur. Inde natum, quod, Agamemnone rem divinam in Troja facturo bos effugerit vixque multo negotio comprehensus reductus est. Tantum Zenodotus. Quadrabit etiam in eos, qui nolentes et adacti quippiam agunt. Olim in sacris spectabatur, ut hostia lenis ac volens adstaret. Quod si refracto fune profugisset, infaustum omen habebatur. Mihi videtur et huc posse referri, quod Agamemnon in Aulide filiam Iphigeniam sacrificavit, sed admodum invitus. Recensetur a Zenodoto.

Index Adagiorum