Adagiorum Chiliades

II. 5.Ne gladium tollas, mulier.li

Μὴ μάχαιραν αἶρε, θῆλυ, id est

Ne machaeram tolle, mulier,

hemistichium est carminis trochaici : Ne suscipias negotii molem, cum nequeas auxiliari. Virorum enim est ἀμύνασθαι περὶ πάτρης, ut inquit Homerus. Potest et in hunc trahi sensum : Ne spem ostendas, quam praestare non possis. Ne mineris aut ne lacessas inimicum, cum lacessitum non queas profligare. Brutus notat Ciceronem, quod Antonium contionibus suis irritaret, quem irritatum non potuerit comprimere, hoc est gladium tolleret mulier.