II. 5. Non pluet post noctem, qua sus agrestis pepererit. xliii

Plutarchus in commentario De causis naturalibus versum hunc ceu proverbio jactatum citat :

Μηκέτι νυκτὸς ὕειν, ᾗ κεν τέκῃ ἀγροτέρα σῦς,

id est

Non jam nocte pluet, sus qua enitetur agrestis.

Sues cicures saepius pariunt ac diversis temporibus, ferae non nisi semel, idque iisdem ferme diebus, nimirum ineunte aestate. Unde negant fore pluviam, posteaquam sus agrestis pepererit, nimirum exactis jam mensibus pluviis. Per jocum usurpari poterit, si dicamus res fore tranquilliores, posteaquam morosus ac rixosus quispiam animo suo morem gessit.