Saltantis personam in toga inducere est quippiam facere neutiquam decorum : veluti si senex aut theologus ineptiat, aut si quis seriis misceat ludicra. Martialis in praefatione secundi libri : Noli ergo, si tibi videtur, rem facere ridiculam, et in toga saltantis inducere personam. Toga civium erat Romanorum et honoris gratia sumebatur ab iis, quid jam excessissent e pueritia, deposita praetexta, ipso cultu virilem animum ac mores profitentibus, unde et virilis toga dicebatur. Hinc illud Ciceronis in Philip. : Sumpsisti virilem togam, quam statim muliebrem stolam reddidisti. Quin et pacis tempore gestabatur, quemadmodum sagum in bello. Unde M. Tullius in Philippicis subinde jubet depositis togis saga sumere. Et idem : Cedant arma togae. Item Lucanus de Pompeio :
Praetulit arma togae, sed pacem armatus amavit.