Σικελὸς ὀμφακίζει, id est Siculus omphacissat. Omphaca Graeci dicunt uvam acerbam et immaturam, ἀπὸ τοῦ ὠμοὺς φαγεῖν, id est quod crudi comedantur. Unde dicebatur in eos, qui libidine furandi quantumlibet vilia tollerent furto. Ductum a furacitate Siculorum. Non perperam dicetur et in illos, qui ob immodicam et praeproperam aviditatem, quo pusillum lucelli faciant sibi, damnum ingens aliis inferunt. Sunt qui credant quadrare posse in eos, qui bellissima quaeque sibi decerpunt, ut Syrus ille Terentianus. Zenodotus ait ex Epicharmo sumptum. Refertur et a Suida.