Adagiorum Chiliades

II. 4Ipsis placet.c

Αὐτοῖς ἀρέσκει, id est Ipsis placet, ubi rem parum nobis probari aut causam nihil ad nos pertinere significamus. Terentius in Andria :

Mihi non fit verisimile. Atqui ipsis commentum placet.

[Andr.] Non admodum abludit ab illo : Suum cuique pulchrum. Suis quisque consiliis suaeque sententiae blanditur. Huc pertinet illud apud Homerum frequens : Ἥνδανε θυμῷ, [Od., VIII, *] id est Placuit animo. Item illud apud comicos : Sic lubitum est animo meo. [Asin.] Et apud Vergilium : Diis aliter visum. [Aen.] Plato libro De legibus tertio retulit hoc proverbium.