I. 2. Satius est initiis mederi quam fini. xl

Ἀρχὴν ἰᾶσθαι πολὺ λώïον ἠὲ τελευτήν, id est

Multo quam finem medicari initia praestat.

Initiis mederi praestat Refertur a Suida proverbii loco. In eandem sententiam Theognis :

Ζητῶμεν δ᾿ ἕλκει φάρμακα φυομένῳ,

id est

Pharmaca nascenti sunt adhibenda malo.

Similiter Persius satyra tertia :

Elleborum frustra, cum jam cutis aegra tumebit,

Poscentes videas : venienti occurrite morbo.

Atque item Ovidius :

Sero medicina paratur,

Cum mala per longas invaluere moras.

Admonet adagium minore negotio tolli malum statim initio, cum adhuc recens est quam posteaquam inveteraverit. Pueros a vitiis arcendos, dum adhuc tenera ac tractabilis aetas sarciendas protinus offensas, ne in simultatem exolescant. Minima vitanda mala, ex quibus majora solent pullulascere. Occasiones evitandas, quae mali quippiam pariturae videantur.