Quoties fit, ut a re proposita ad aliud quippiam longe diversum digrediamur, de calcaria in carbonariam decurrere dicimur, sive cum ex uno malo in aliud diversum incidimus. Tertullianus libro De carne Christi : Igitur, inquit, de calcaria, quod dici solet, in carbonariam, a Marcione ad Apellem. Huic non dissimile est illud Ciceronis in actione pro Murena : Respondebo igitur Postumio primum, qui nescio quo pacto mihi videtur praetorius candidatus in consularem quasi desultorius in quadrigarum curriculum incurrere.