Adagiorum Chiliades

II. 4.Indulgere genio.lxxiv

Proverbiales sunt et illae figurae : Defraudare genium, pro eo, quod est negare naturae, quod appetit, et Indulgere genio, pro eo, quod est animo obsequi. Terentius in Phormione : Suum defraudans genium. [Phorm.] Plautus in Truculento :

Sed istos, qui cum geniis suis belligerant, parce promi,

[Truc.] sordidos et parcos significans. Idem in Aulularia : Egomet fraudavi meum genium. [Aul.] Contra Persius satyra quinta : Indulge genio, carpamus dulcia. [Sat.] Unde et genialem appellant diem laetum et voluptuarium, et genialiter vivere pro molliter et laute.