II. 4. Promus magis quam condus. lxxiii

Sane quam elegans et proverbialis Ausonii dimeter iambicus :

Promusque quam condus magis,

In quendam profusiorem, qui parta prodigere nosset, quaerere aut quaesita servare non nosset. Sumpta metaphora a rei familiaris dispensatoribus, maximeque penuariae, quos Graeci ταμίας vocant, quorum parteis sunt ad usum familiae promere, id est proferre, quaedam alia condere, hoc est seponere. Jam qui tantum promit, is ad inopiam velis equisque properat. Plautus in Truculento parce promos appellat sordidos ac tenaces et qui sumptum libenter effugiunt.