II. 4. Barbam vellere. lxix

Τὸν πώγωνα τίλλειν, id est Barbam vellere. Est illud quoque sumptum a gestu : barbam vellere, quo summum contemptum ac ludibrium significamus. Horatius Sermonum libro primo : Barbam tibi vellunt / lascivi pueri. Persius :

Idcirco stolidam praebet tibi vellere barbam

Juppiter ?

Idem alias :

Si Cynico barbam petulans nonaria vellit.

Et Dionysius Siculus non dubitavit Aesculapio barbam auream detrahere. Lucianus in Timone de Jove Olympio : Ἐκάθησο τοὺς πλοκάμους περικειρόμενος, id est Desidebas, dum tibi circumtonderetur caesaries. Et Barbam vellit mortuo leoni, qui ferox est in prostratum, quod alias attigimus.