Adagiorum Chiliades

II. 4Medium ostendere digitum.lxviii

Medio item digito porrecto supremum contemptum significabant. Martialis libro secundo :

Et digitum porrigito medium.

[Epigr., II, *] Nam hunc digitum Martialis impudicum vocat :

Ostendit digitum, sed impudicum.

[Epigr.] Persius infamem :

Infami digito et lustralibus ante salivis.

[Sat.] Huc arbitror pertinere, quod apud Laertium Diogenes, ut alibi diximus, hospitibus quibusdam Demosthenem videre cupientibus non indice digito, sed medio porrecto demonstravit, parum virum innuens et effeminatum. Ac paulo post eodem in loco satis indicat porrectione digiti medii quippiam obscaenum significari, cum ait insanos haberi, qui medium porrigant digitum, qui indicem, non item. Itaque eodem in carmine duobus adagiis extremum contemptum indicavit satiricus :

Mandaret laqueum mediumque ostenderet unguem.

[Sat.] Elegantius fiet utrumque, si longius detorqueatur, ut Philosophicis praeceptis laqueum mandes, tu tuo vivito more et Theologorum decretis negotiatores medium unguem ostendunt, id est plane contemnunt ridentque.