Adagiorum Chiliades

II. 4Periculosum est canem intestina gustasse.xxii

Χαλεπὸν χορίων κύνα γεῦσαι, id est

Intestina canem semel adgustasse periclum est,

proverbali allegoria dictum est a Theocrito in idyllio decimo. Admonet adagium haud facile temperare a peccando, qui semel illecebram illam velut auctoramentum vitiorum degustarit, quemadmodum qui semel scortum attigerit, qui semel perjurio sive furto rem auxerit, qui semel aulicam vitam sit expertus. Effertur et ad hunc modum apud Lucianum : Οὐδὲ κύων παύσαιτ᾿ ἂν ἅπαξ σκυτοτραγεῖν μαθών, [Ind., 25] id est Neque canis desiturus est, qui semel corium edere didicerit. Theocriti scholiastes indicat hoc proverbium et hunc in modum efferri : Χαλεπὸν μαθοῦσα κύων σκυτοτραγεῖν, [Idyll.] id est Periculosa res est canis, quae didicit arrodere coria. Horatius in Sermonibus simili figura dixit :

Quae si semel uno

De sene gustarit, tecum partita lucellum,

[Epist., I, 2, 69] Ut canis a corio nunquam absterrebitur uncto.