II. 3. Anima et vita. lxxxix

Ζωὴ καὶ ψυχή, id est Anima et vita, de re supra modum suavi. Proverbium natum in cubilibus atque inde deductum in communem sermonem. Videtur autem peculiare fuisse mulieribus. Juvenalis :

Ζωὴ καὶ ψυχή, modo sub lodice relictis

Uteris in turba.

Item Martialis epigrammatum libro X in Laeliam :

Ζωὴ καὶ ψυχή, lascivum congeris usque,

Proh pudor ! Hersiliae civis et Egeriae.

Huc respexit Juvenalis, cum ait  : Concumbunt Graece. Hesiodus pecuniam animam mortalibus esse dicit :

Χρήματα γὰρ ψυχὴ πέλεται δειλοῖσι βροτοῖσι,

id est

Pecunia enim anima est miseris mortalibus.

Et Aristoteles pecunias velut alteram hominis animam esse scripsit. Nihil autem est vita neque jucundius neque carius.