Ὅσα Μῦς ἐν Πίσσῃ, id est Quanta Mus apud Pisam, subaudi tulit aut simile quippiam. De iis, qui vincunt et optatis potiuntur, sed non sine summo negotio neque citra magnum incommodum suum. Suidas natum ait ab athleta quodam seu pugile Tharentino, qui in Olympiacis certaminibus apud Pisam semel dumtaxat victor discessit, idque plurimis acceptis plagis. Plutarchus Simposiacon commentario quinto docet apud Pisam μονομαχίας, id est singularia certamina, celebrari solere, in quibus etiam ad caedem usque affligebantur ii, qui succubuissent.