M. Tullius in oratione pro Murena, comparationem faciens jureconsultorum et oratorum : Itaque mihi plerique videntur, inquit, initio hoc multo maluisse, post, cum id adsequi non potuissent, istuc potissimum sunt delapsi. Ut aiunt in Graecis artificibus eos auloedos esse, qui citharoedi fieri non potuerint, sic nonnullos videmus, qui oratores evadere non potuerunt, eos ad juris studium devenire. Hactenus Cicero. Recte dicetur in eos, qui malunt in multo inferiore ordine alicujus haberi momenti quam inter excellentes negligi, quemadmodum Julius Caesar maluit in frigido oppidulo primus esse quam Romae secundus. Nec male quadrabit in eos, qui desperatione meliorum ad humiliora sese conferunt. Citatur idem adagium in Decretis ex Augustino in monachos malos ad clericorum gregem desciscentes.