II. 3. Numerus. xxiii

Homines nullius bonae rei numerus proverbio dicuntur, etiam idiotis horum temporum. Aristophanes in Nebulis :

Ὄντες λίθοι,

Ἀριθμός, πρόβατ᾿, ἄλλως νενασμένοι ἀμφορᾶς.

Horatius :

Nos numerus sumus et fruges consumere nati.

Translatum videri potest a calculis ad nihil aliud utilibus nisi ad numerum. Anacharsis, Plutarcho teste, taxavit Athenienses, qui nummis ad rationem dumtaxat uterentur. Quanquam mihi magis arridet, ut ita numerus dicatur, quemadmodum dicunt : ἐτώσιον ἄχθος ἀρούρης et εἷς τῶν πολλῶν, id est unus e plebe. Ita Flaccus : At sum mi paulo infirmior, unus / multorum, etiam Graecam exprimens figuram. Et Seneca lib. I, epistola X : Iste homo non est unus e populo. Insignes nominantur ; qui nihil habent insigne, turba sunt et numerantur tantum. Unde Flaccus : Nos numerus sumus, et Vergilius : Cadit et sine nomine vulgus.