II. 2. Corpore effugere. lxxxvii

Corpore effugere est periculum jam imminens ac poene premens arte quadam declinare. Translatum a gladiatoribus ictum modico corporis flexu fallentibus. M. Tullius in Catilinam invectione prima : Quot ego tuas petitiones ita conjectas, ut vitari posse non viderentur, parva quadam declinatione et, ut aiunt, corpore effugi ! Hactenus Cicero. Itaque quoties aliquem discrimine quam minimo a periculo abfuisse significabimus, corpore declinatum malum dicemus. Minus enim periclitantur, qui moenibus aut alio quopiam objectu defenduntur ; verum qui nudi telis objecti nihil habent, quo se tueantur, nisi commodo corporis deflexu, ii demum in extremo periculo versari videntur. Paene diversa figura dixit Catullus :

Contra nos tela ista tua evitamus amictu,

id est facile depellimus, non secus quam muscarum insultus.

Index Adagiorum