II. 2. Carpet citius aliquis quam imitabitur. lxxxiv

Μωμήσεταί τις μᾶλλον ἢ μιμήσεται, id est

Reprehendet aliquis citius atque imitabitur.

Senarius hic Apollodori pictoris operibus inscribi consuevit, qui primus umbrarum imitationem invenit. Refertur ad hunc modum :

Μωμήσεταί τις θᾶσσον ἢ μιμήσεται.

Apte dicetur de re quapiam artis absolutae atque inimitabili. Porro res egregias multo proclivius est carpere quam aemulari. Caeterum est elegans προσονομασία in duabus vocibus Graecanicis : μωμήσεται et μιμήσεται, quae cum sono minime distent, tamen res declarant longe diversissimas. Huc allusit Plin. lib. XXXVII. cap. XI : Imitati multi, aequavit nemo. Theognis in eandem sententiam :

Μωμεῦνται δέ με πολλοί, ὁμῶς κακοὶ ἠδὲ καὶ ἐσθλοί,

Μιμεῖσθαι δ᾿ οὐδεὶς τῶν ἀσόφων δύναται,

id est

Carpunt me plures docti indoctique, imitari

Nos indoctorum de grege nemo valet.