Ἀεί τις ἐν Κύδωνος, id est Semper aliquis in Cydonis domo. Cydon Corinthius quispiam erat adeo insignis hospitalitate, ut etiam proverbio locum fecerit. Refertur a Suida pariter et a Zenodoto, neque non ab Aristophanis interprete. Haec cum non careant gratia, quoties simpliciter accommodantur ad homines φιλοξένους, tamen plusculum habebunt veneris, si ad animum deflectantur ; veluti, si quis admoneat pium hominem, ne sinat animum suum quibuslibet cogitationibus patere.