Ἀγναμπτότατος βάτος αὖος, id est Rigidissimus rubus aridus, aut Ἀγναμπτότερος βάτου αὔου, id est Rigidior arido rubo, proverbialis est comparatio in difficilem atque inexorabilem ac praefractum et suorum, ut vulgo vocant, morum hominem. Quod genus homines Graeci vocant αὐθεκάστους, id est suo quodam instituto viventes expertesque sensus communis. Refertur adagium a Suida simul et a Zenodoto. Ductum admonent a rubo, qui simul atque exaruit, rumpi potest, inflecti nequaquam. Unde et in senes accommodatius dicetur aetatis vitio difficiliores.