II. 1. Ne musca quidem. lxxxiv

Huic affinis est et illa proverbialis hyperbole : Ne musca quidem, qua maximam hominum solitudinem significamus. Plautus in Truculento :

Quas tu mulieres

Mihi narras, ubi musca nulla femina est in aedibus ?

Huc allusit Vibius Crispus, orator delectationi natus, ut ait Fabius, cujus erant mores, qualis facundia, quemadmodum scripsit Juvenalis, cum rogatus, ecquis esset cum Caesare in conclavi, respondit ne muscam quidem intus esse, ancipiti joco Domitiani consuetudinem notans, cui mos erat quotidie sibi secretum horarium captare, nec interim aliud fere agebat, nisi quod muscas captas stilo configeret.

Index Adagiorum