Adagiorum Chiliades

II. 1Lolio victitant.xxix

Aenigmate proverbiali lolio victitare dicuntur lusciosi et caecutientes, quos Graeci, teste Nonio, myopes vocant. Plautus in Milite :

Mirum est lolio victitare te, tam vili tritico.

Quid jam ? Quia lusciosus. Verbero, edepol tu quidem

Caecus, haud lusciosus.

[Mil.] Lolium autem Plinius inter frugum pestes commemorat una cum carduis ac tribulis. [Hist. Nat.] Vergilius in Bucolicis :

Infelix lolium et steriles dominantur avenae.

[Buc., 5, 37] Item Georgicon libro primo :

Mox et frumentis labor additus, ut mala culmos

Esset rubigo, segnisque horreret in arvis

Carduus. Intereunt segetes, subit aspera silva

Lappaeque tribulique, interque nitentia culta

Infelix lolium et steriles dominantur avenae.

[Georg.] Inest autem lolio peculiare quoddam malum, ut oculis caliginem inducat, id quod indicat Ovidius libro Fastorum primo, cum ait :

Et careant loliis oculos vitiantibus agri.

[Fast.] Hinc nimirum jocus proverbialis.