II. 1. Barbarus ex trivio. xx

Βάρβαρος ἐκ τριόδου, id est Barbarus ex trivio, in hominem dicebatur extremae humilitatis ac prorsum nullius precii, perinde quasi dicas externum ac vilem servulum alicunde e triviis emptum, non dono datum aut domi natum. Lucianus in eum, a quo fuerat Prometheus appellatus : Οἷος ἐκ τριόδου βάρβαρός τις παρὰ μικρόν, id est Qualis poene barbarus quispiam e trivio. Quanquam quidam hoc loco legunt non barbarus, sed βόρβορος ἐκ τριόδου, id est caenum e trivio, quae lectio sola probanda est, mea quidem sententia, propterea quod eo loco de luto fiat mentio, non de barbaro quopiam. Item Plato De rep. septimo : Καὶ τῷ ὄντι ἐν βορβόρῳ βαρβαρικῷ τινι, id est Ac revera in caeno quopiam barbarico. Loquitur de anima demersa tenebris ignorantiae.

Index Adagiorum