Ἀτρέμας βοῦς, id est Lente bos, subaudiendum incedit aut simile quippiam. Congruet in illos, qui placide ac paulatim citraque tumultum, sed tamen assiduitate rem conficiunt. Equorum laus est velocitas. Boves non valent celeritate, sed viribus et assiduitate pollent, non impetu ; proinde in pugna stataria, vel leonibus formidandum animal, et ad exhauriendos ingentes labores appositum. Eodem pertinet illud : Bos lassus fortius figit pedem. In sacris precibus tradit Plutarchus in commentario de Osiride et Iside, mulieres Eleas publicis ac sollemnibus votis ad hunc modum solitas Bacchum invocare, ut accederet βοέῳ ποδί, id est bubulo pede, sive quod huic animanti, cum sit viribus immensis praeditum, deinde tanta corporis mole, tamen peculiare videatur molliter quasique pedetentim ingredi nulloque strepitu, vel quod bovis pedes arva calcatu reddunt meliora, cum reliquorum animantium noceant.